回頭來時路

– 簡忠松自述 –

2011年5月21日張炎憲博士口述歷史專訪自述文

話頭

我退休了住在Austin Great Hills這個所在。我厝後邊兮綠谷通向Great Hills公園。沿著公園高高低低兮路有真繁茂兮樹木與花草；鳥隻嘰嘰喳喳真鬧熱；小動物親像鹿仔、松鼠、野兔仔亦不時看會到。我差不多每日攏會帶阮兮三隻狗去行這條公園路。在彼行路兮有大學教授、律師、作家、高科技專家、電腦專家、藝術家等等，講起話攏會講起著個人家庭歷史或是原鄉兮故事，有兮人講尹只知家己兮父母，阿公、阿嬤尹就毋知；有人講笑講尹阿公是馬賊或是牛郎仔；但是差不多大家攏希望尹祖先會得將尹兮故事寫起來予後代會得知尹移民來北美奮鬥兮生活過程。

我在行山路常有時間去回想我兮童年、小學、大學、結婚、出國、討生活、創業、參與台灣人活動兮經歷。我想我會得將這些經歷寫起來予我兮後代囝孫知曉阮兮故事。我今嗎用台文寫予知台文兮人讀；我用英文寫”A Trail of Formosan Nostalgia”，是予囝孫來讀，尹毋識台文。

台文本身有真多種，有人用漢羅，有人用現代語台文，但是我今嗎寫兮是簡式（毋是簡氏）台文；就是我用我所知兮母語白話式與大部分人所熟識兮華文文言式簡單靈活使用。我兮母語是蘭陽腔兮福佬話。用母語思考兮人讀會順嘴，用華文思考兮人”看”會順眼。

家族身世

講起阮家族身世，我就有必要講起原鄉宜蘭兮開發簡史。

在台灣兮拓發史上，蘭陽地區兮開發是算晚期兮，在十九世紀初葉為止，台灣兮西部差不多攏開發完了。續下去就是開發東部海岸與中央山岳地帶。上代先想要開發蛤仔難，就是宜蘭地區，是林漢生。伊在一七六八年就率領佃丁想要移墾蛤仔難，但是尹互原住民攻擊敗退。

第二批想要開發蛤仔難是漳州人吳沙，吳沙駐在雞籠（基隆）。吳沙與蛤仔難兮原住民有交易買賣，所以真受原住民兮信任。伊在蛤仔難兮交界三貂社建築道路、橋梁，準備率領住在雞籠、淡水兮漢人來進入蛤仔難，彼當時林爽文抗清事件平定，清府為著擴張清國版圖，特別授權吳沙開拓蛤仔難。

吳沙用漳州系統移民為主力，泉州系與客家系相配合，用軍隊式兮開拓隊在一七九六年由雞籠向蛤仔難出發。吳沙在蛤仔難海岸烏石港建築堡壘稱為頭圍。到此原住民看出吳沙兮侵略野心，尹竭力抵抗，將吳沙兮上千開拓隊趕出蛤仔難。這時陣蛤仔難原住民發生天花病，吳沙用伊兮醫療藥方來治天花，伊真受原住民兮感恩，伊就又開始進行墾發蛤仔難，但是伊禁止私墾，來避免與原住民衝突。

兩年後吳沙病死，伊兮侄兒吳化繼續開發工作，由頭圍出發向二圍、三圍、四圍、五圍（宜蘭市）、漸漸深入蘭陽平原地帶，一直到濁水溪北面。在這期間吳化兮開墾隊亦一直受原住民兮攻擊；同時，漳泉客三族中亦一直相爭械鬥。

吳化為著順利開發工作，加強統率力量，伊家己擔任「總頭人」，親像荷蘭時代兮「大結首」下面任命「頭人」（相當「小結首」）；總頭人、頭人就是負責發號施令，分配土地，調解紛爭等等。今嗎大結、二結、三結、四結、五結、六結等等地名，就是當初開墾土地或是分配土地兮遺留史蹟。

一八０二年移民愈來愈多，吳化改編隊伍，擴張為「九結首」；漳系兮吳、楊、林、簡、陳、張、廖等七姓；泉州系兮劉姓；客家系兮李姓為主力軍，渡過濁水溪開墾溪南一帶。台獨聯盟前副主席陳希寬博士兮阿祖就是開發三星沿山一帶、蘇澳與南澳等地兮陳協台輝煌公（1838-1894）。因為伊在砲轟法國海軍侵攻蘇澳港有功而且對開通蘇澳與花蓮兮沿山交通真有貢獻，原住民在花蓮有一間伊兮廟。

羅東是平埔話講「猴」；真可能在開墾以前羅東所在是猴兮天地。在唐山人來蛤仔難開發以前，羅東已經由平埔族開發。羅東中正路兮慈德寺是ㄧ八二０年所建；廟中供奉觀音佛祖、城隍爺、大眾爺、以及平埔族酋長賢文、茅格兮神位。所以慈德寺亦有人叫作「番仔廟」，是用來感念賢文、茅格開發羅東兮功績；尹二人盤山過嶺由台灣西部過來開墾羅東。慈德寺這個所在亦叫作賢文里。在全台灣將平埔酋長神格化奉祀在廟內與佛祖、城隍爺等神明平作，可能只有羅東慈德寺。羅東人兮人情味實在真予咱來呵咾；這是羅東祖先吃果子拜樹頭，飲水思源兮赤子之心。

蘭陽平原兮平埔族主要是噶瑪蘭（Gavalan）；在吳沙移民進入以前，尹世世代代住在三面是山，一面倚海兮蘭陽平原，尹有三十六社，濁水溪溪北是西勢二十社，溪南是東勢十六社；加禮宛是其中一社，亦就是Gavalan兮代稱。吳沙兮移民來到蘭陽真多，羅漢腳仔就變成噶瑪蘭母系社會兮囝婿。我相信宜蘭地區至少有百分之九十五是有噶瑪蘭平埔兮血統；有真多平埔人奔向後山花蓮港，花蓮市北爿有一個所在叫作「加禮宛」，是平埔族走來後山兮根據地。

我回憶阮家族老輩講起一寡「平埔番」兮故事，祖先受番割兮代誌。故厝附近兮田園有真多無主墳，阮阿伯耕田時不時發現掘著無主骨。我會記阮阿伯攏撿起來在田頭做墳墓，每年按節祭拜。故鄉亦有有應公廟，祀奉無主兮好兄弟仔。阮家族是住在家己簡家兮竹圍內；有四間瓦厝分別大伯、二伯、三伯與阮一家。聽講阮阿公簡奇財原來是在三星送批信，伊兮大兄過身了後伊轉來二結照顧猶小漢兮大伯與三伯，伊亦繼續開墾田地。我有二個阿嬤；二伯是阿公分來飼，阮阿爸是伊唯一兮親生囝，我有真多阿姑，大漢了尹嫁在羅東、三星、蘇澳、大洲等所在。我對阿公無什印象，只知伊在日據時代是”保正”；厝內有日本天皇全家兮相片，一寡日本人兮物件，機器曲箱會當聽音樂等等。

我阿爸叫簡伊藤，真可能是無完全皇民化所號兮名；伊生作真翲翩，我記憶內伊穿白西裝戴巴拿馬帽仔真好看，伊羅東高等科畢業，字寫得真讚，算盤真精。我在伊兮一張日本宜蘭法院聘書看到伊做法院書記月俸四十圓。大戰了後伊在農會做代誌。農會兮人真愛飲酒，阿爸時常三更半暝醉茫茫轉來厝。阮阿母兮親生父母住在宜蘭姓賴。伊兮養父母是二結陳家。二結陳家阿公是紙廠技工收入真好。阿母與阿爸是羅東高等科同學。在婚前伊在日本醫師前田病院做護士；阿母真現代化穿洋裝上下班，伊少女時代是美女，看真多日本冊與雜誌；伊常講予我聽日本冊小說故事。

我有一個大兄，兩個阿姊一個小弟；亦有真多堂兄弟、堂姊妹與表兄弟、表姊妹等；阮常常作伙蹉跎。我兮童年是ㄧ個真快樂兮回憶。

我出生時龍飛鳳舞，竹炮聲連連，普天同慶，彼是ㄧ九四四二月十七舊曆新正。