514. 蕭泰然kap「台灣翠青」 / 鄭兒玉 /02/2017

蕭泰然kap「台灣翠青」

作者 鄭兒玉

因爲同屬tī台灣基督長老教會,筆者早就聽見tī南部有一位名叫蕭泰然ê作曲家。筆者本人是一位近代基督教思想史kap歷史哲學之學徒,因爲互相專門離太遠,起初並無相識,自然就無互動。

到1969年,蔣家政權tī國際間地位jú無隱定,自然對國內ê壓迫jú殘忍。台灣人暗中切求尊嚴、自由、kap民主ê願望愈強。當年救主聖誕節前,tōh是待降節(Advent)時,筆者体會得 thang色列子民tī亡國中,仰望彌塞亞(Messiah救世主)降生ê心情,就將當時ê美國烏人人權運動詩歌“We Shall Overcome”,得tiōh台南神學院ê音樂老師駱維道牧師之幫助,翻譯做台語「咱要出頭天」,做爲待降節之詩歌。

無phah算chit句「出頭天」,即時被海內外ê獨立運動人士採用爲該運動之口頭語。自然開始用chit字ê教會成做K政權之眼中釘。另外一方面,由chit時起筆者亦加倍用功,連續作出數首鼓推台灣人爭取尊嚴、民主、kap自由等運動ê詩歌。

筆者tī1975年7月,tī紐約大學召開ê美東台灣人夏令會,以黃芎蕉ê筆名初次發表「流浪海外台灣人ê心聲」,hō三千外人ê參會者公開地,大小聲啼哭:唱出烏名單中流浪者之哀歌。

這tī海外hō台灣建國意識大覺醒,而且大風動ê夏令會後,有數位親友暗中建議筆者tiōh準備:有一日台灣若出頭天建國ê時,國民要唱出「尊嚴而自由民主」ê國歌。筆者雖然感覺課題siu。大koh相當困難,亦開始構想。

1989年,筆者tī南神社硏所,突然接tiōh由洛杉磯來ê越洋電話。對方是許丕龍先生,結介蕭泰然教授願要作曲筆者ê「遊子回鄉」。及時本人向蕭教授回答講,「你chit位大作曲家,求之不得ê lah,請進行」。這是筆者kap蕭教授第一pái接觸機會。

1991年,旅行到洛杉磯ê筆者,siōng重要ê手包被偷。身無一文、無護照、koh無機票ê筆者,不得不tiōh加tòa tī該市—週。Tī chit週中間,蕭教授kap筆者有決定二項重要tāi-Chi:第一是筆者作遊行用ê詩詞:「咱是台灣主人」,由伊作曲。第二號koh-khah重要。會記得有一夜,由吳西面先生kap夫人招待tī一間ê日本餐廳,受請ê人客大概是許丕龍先生、陳黃義敏牧師、蔡長宗醫師、黃祖德先生、蕭教授、kap鄭兒玉等。

聚餐進到中站,蕭教授講,伊tī1984年往觀看tī洛杉磯舉行ê Olympic Games時,感慨講「何日tang時咱台灣選手,來chia大會競爭一等ê,大會就唱咱ê國歌,koh升咱ê國旗leh?」聚餐中人士一時靜靜無語。講來講去,就建議鄭兒玉作詞,蕭教授作曲,應積極進行,chiah散會。

Ti翌年(1992)筆者完成最後稿(第12稿),蕭教授亦完成其作曲。伊並將本詩歌倂入爲教授tú-teh進行中之畢生大作,tōh是台灣大歷史樂-「1947序樂」之結論樂章。Tī chit中間,伊ê心臟病非常嚴重發作,tī差不多無可能醫治ê中間,上帝有憐憫伊,亦聽海內外台灣人ê迫切之祈禱,經由醫生ê手來醫治伊。所以今á日咱台灣人才有「1947序曲」kap「台灣翠青」。

Source from Taiwan Tribune Issues 2154, 04/06/2007

Posted in 02/2017