1186. 台灣人智慧俗語 / 溫惠雄 /05/2002/Language/語言

台灣人智慧俗語

作者 溫惠雄

自序

「台灣俗語」是咱祖先最偉大的文化遺產,四百年來一代傳一代的智慧結晶,是生活體驗的金言玉語恰處世良言,是台灣文化最傑出的表現恰記錄。有人愛用「諺語」來定義,親像卡高尙,認爲人類生活體驗的累積,表現人類的觀點、感受知識、經驗、特性。我比較愛用「台灣人智慧俗語」是台灣人的智慧結晶。

「俗語」是通俗的語言,出於草根民間文化,雖然是無讀冊的人,嘛會講嘛會瞭解,所講的話,無親像中國人的「唐詩」三百首,愛有讀冊讀真久的人才會瞭解,「台灣俗語」是咱祖先人生的體驗,用真通俗快瞭解的生活用語講出來,互男女老幼連無受教育的人,攏會曉講恰瞭解。

閣有歷史的見證,親像「有唐山公無唐山媽」,台灣人先祖有原住民平埔族的混合血統,平埔族被同化消失了,「番婆快牽,三腳鼎奧安」。佇農業社會要選擇新婦時,就有俗語講:「買田看田底,娶新婦看娘咧」,「家己種一欉,卡贏看別人」。「差豬差狗,不如家己走」。終戰後國民黨統治時代「選舉無師傳,用錢買就有」。當台灣退出「聯合國」1971年,台美斷交1979年時,是咱移民來美國潮「先來先死,慢來慢死,無來富死」,「先來先歡喜,慢來慢歡喜,無來驚就死」。這些「俗句」通瞭解當時時代背境,社會情形。「台灣俗語」不止通俗好念,閣有真美的「押韻」。「飼子無論飯,飼父母算頓」。親像「蜜蜂」一樣,親像佇文學有三種功能:(1)「身短」:雖然是一句短短,好念閣好記!(2)「刺」:一針見血,留下深刻印象,醒世警言!(3)「甜蜜」:有教育智慧的結晶!

我出世佇日本時代的「台語家庭」,家父可講是「俗語專家」,逐日聽父母講話,攏有聽未少「台灣俗語」,細漢出入「台語教會」逐禮拜日去「台語教會」讀台語羅馬「白話字」才會曉用台語唱聖詩,用台文讀聖經,聽台語講道,時常聽著牧師用「俗語」譬喻。佇國小、初中、高中時代,國民黨政府不准講母語,要罰錢、罰站……等等。互我非常反感,可愛的母語爲啥物未使講呢?我佇課外攏講台語,故意不講北京話。就讀台南神學院六年久,除了一年在東海大學進修用北京話外。教授攏用台灣話特別院長黃彰輝博士在上課用俗語 「海枯將見底,人死不知心」來釋義「神學」,真有意思。當時真多教授漢文真飽,學習未少「台灣俗語」。

我愛唱歌,高中時代恰同學組男聲四重唱常到各教會演唱。神學院時代每禮拜日到各教會指揮聖歌隊,欲畢業時,有高主香教授自美國學成歸台,帶來全台灣第一套「手鐘」,當時日本嘛也無「手鐘」,受日本基督教團邀請,到日本教會、基督教大學、高中、日比谷大會堂……等演奏及演唱甚受好評!

指揮恰伴奏及團員一共十三名。特別邀請二名男聲學長助陣,在學的學生男聲只有我與台南市YMCA總幹事黃德成牧師。當時女聲陣容真好,是歷屆音樂系最優秀一班,阮準備台語、北京話、日本話、英語、拉丁文。結果發現最受歡迎是台灣民謠「望春風」,有女生感動到流目屎。從那時起啓發我的台灣意識,咱台灣人愛唱咱的「台灣民謠」恰「台灣歌」,後來我指揮聖歌隊或社會合唱團,三十多年攏唱台語,有時家己將英文北京語譯成台語,總共出版十多本台語合唱集、台灣民謠、黑人靈歌、詩班之友、百合花開等。我爲翻譯台語詩歌,需要照原意,閣有押韻,唱起來才好聽!我就費真濟時間學習,特別在「台灣俗語」尋著真好閣有押韻詩句來用。

先父在世,佇「經商」真成功時,不忘到處義務傳福音,全台走透透,真受歡迎,主要他用通俗的「台灣俗語」,講解基督教福音,有時在廟邊,呣識受反對或驅趕,主要伊有好口才,閣有用「台灣俗語」講故事,互人容易接受,先父溫再養佇十年前過往,伊佇晚年有準備要出版「台灣俗語」,已寫真多手抄本及錄音帶,因爲眼睛姆好,叫我協助抄寫。當時我因爲事業無閒,做保險公司經理,爲趕業績,多次在個人與分公司,西部十三州得第一名。在無閒時乃無忘記先父交代,有時間慢慢整理,常在報紙、雜誌發表,甚受鼓勵,今年決心出版。

此次會得通出版這本「台灣人智慧俗語」。首先著感謝幾個人:第一是蘇芝明先生創設台文「HOTSYS®」電腦。第二是李婉婉女士,費真濟時間、義務協助、設計指導。第三是電腦專家廖建榮先生,對開始到結束,全力協助幫助才有今日!第四是感謝洛杉磯台灣會館楊淑婷會長與台文專家石秀文博士,義務在光碟(CD)上錄音最難得是阮“牽手”溫梨枝,本來對電腦與英打是白痴攏未曉的人,努力打拚中用伊「一指神功」打完整本台文,非常認真又辛苦,常常打字到深夜二點才休息,深深感謝與感佩!

謹以獻互養飼栽培我的 先父溫再養 先母溫主愛

溫惠雄 於洛杉磯

 

作者簡介

溫惠雄 1938年出生台灣台南市

讀冊  台南神學院道學碩士

東南亞神學硏究院心理學碩士

美國福樂(Fuller)神學院博士班候選人

經歷  台灣甲仙岡山基督長老教會牧師

台南神學院心理學講師

美國洛杉磯台灣基督長老教會牧師

美國大都會保險公司經理

長榮保險公司董事長

美國台灣人獅仔會會長

現任  洛杉磯台灣語文促進會會長

南加洲台灣人長輩會會長

國際獅仔會Foothill Region C zone 2000〜2001年區主席

大洛杉磯台灣會館董事

出版  1. 台灣婆媳問題。

  1. 台灣民謠合唱集、黑人靈歌、詩班之友、百合花開、 青年福音詩歌、特別節期慶典詩歌等十外本合唱集。
  2. 台灣童謠詩歌精選。

Published in 05/2002

Donated by Mr. Tim Wang 01/2018

Posted in 02/2018