相思蟬

作者　胡民祥

美哉！台美人

第二次世界大戰欲結束進前，先有1944年6月初六歐洲戰場的諾曼第登陸戰，一年後的5月德國投降，歐洲戰場結束；佇太平洋戰場裡，1945年3月美軍收復菲律賓，跳過台灣，4月直攻琉球，血戰近欲三月日，紲落去，日本佇8月15無條件投降。

美國投入二次大戰，帶來軍事工業的勇健起飛，戰後帶動民生工業的大發展，美國製品行銷世界，國力空前，領導世界。美國主導世界事務，無經過台灣人民的同意，將台灣帶入世界強權政治的漩渦裡；雖然，台灣人民脫離日本殖民統治，不幸，嘛進入一個無人預知的風風雨雨的一甲子，夠今，猶咧没没泅。

佇日本天年的五十年裡，台灣知識分子去夠日本留學，吸收西洋文化，台灣人行入廿世紀現代化的潮流；發出：「台灣是台灣人的台灣」，台灣人欲民主，欲台灣民族獨立。戰後，台灣留學生大舞台徙夠美國，留美潮流唯六十年代開始起飛。來夠九十年代，留美學生人數累積約有廿萬人，加上唔是留學的移民人數，道約有卅萬的台灣裔美國人。台灣裔美國人簡稱「台美人」，來夠2014年，台美人累積約有五十萬人。

佇北美洲生湠落來的「一世台美人」，為著祖國台灣的運命，有人投入台灣獨立運動，付出誠濟心血；有人為台灣經濟、文化、藝術、文學、婦女權、勞工、原住民、環保……等等，付出怹的青春；嘛有濟濟的人，暝日認真拍拼，為著佇新天地生存。「一世台美人」經歷思鄉漂泊，終至佇北美洲落土生根，怹開拓出一段血及目屎交織的「悽涼又壯美」的歷史，內底有男女愛情婚姻的悲喜流變，嘛有日常生活的喜樂苦澀甘甜，小人物參大人物鋪滿台美人的舞台。半世紀落來，二世台美人成長，三世嘛出世，啊！一世台美人垂垂老去矣。

佇世界大舞台裡，一世台美人再次驗證移民的天律：「他鄉徛久是我鄉。」這款離開祖國台灣，不管是自動的，抑是被動的，最後，攏是客觀行夠「土斷北美洲」。早台美人約三百年，歐洲人佇北美洲土斷生湠落來，當然，一世台美人有伊的特殊性。移民土斷新天地無論是有通性，抑是有特性，攏有價值記錄落來。早年，我用詩及散文進行過，寫一世台美人的生活，出版三本散文集：《茉里鄉紀事》、《夏娃伊意紀遊》、《水鄉花草工程路》，兩本詩集：《台灣製》、《台灣味青草茶》。

佇2011年熱人，我唯工程生涯退休，決定轉換跑道，行向小說。

這本《相思蟬》小說集總共有八篇，算是我書寫「台美人小說系列」的開始，所用的語文是「台語文」。因為，我出生佇台灣嘉南平洋的莊腳，自細漢道「嘴講台灣話」；來夠美國，台灣同鄉會裡出出人入，嘛攏是嘴講台灣話。所致，欲寫台美人生活故事，誠自然道用「台語文」。

誠有幸，拄著恁：各位讀者朋友。請恁用台語思考，來讀我寫的台美人小說，保證恁讀甲溜溜叫。佇遮，衷心感謝恁逐家的參與，進行文學的「讀者、作品、作者」三度思維空間的對話交流。

美哉！台美人，向望咱後會有期。

寫佇北美賓西茉里鄉，2014聖誕節

作者

胡民祥簡介

台南善化胡厝寮人，1943年生，1967年留美，機械工程博士，西屋公司工程師（1974-2011），定居北美賓州西爿的茉里鄉。匹兹堡台灣同鄉會1979年會長，北美台灣文學研究會1986-88年秘書，担任《台灣文藝》1990-93年編輯委員，主編《台灣公論報》【台灣文化專刊】及【文學園】（1998-2002），前後安排十外位台灣作家來北美訪問交流。現此時「陳文成教授紀念基金會」理事，「台文戰線」社員。投入台灣人解放運動，唯文學切入去，探討台灣文學史，認知台灣語文是台灣民族國家的必然要素之一，投入台語文學寫作；北美徛久是我鄉，記錄台美人思鄉、漂泊、土斷生活。著作參編輯有以下書冊：

《胡民祥台語文學選》（台南縣政府版）

《胡民祥台語文學選》（金安文教機構版）

《茉里鄉紀事》（台語散文集）

《夏娃伊意紀遊》（台語散文集）

《水鄉花草工程路》（台語散文集）

《台灣製》（台語詩集）

《台灣味青草茶》（台語詩集）

《台語母奶情深》（台語文學評論集）

《走揣台灣文學痕跡》（台語文學評論集）

《結束語言二二八》（《台灣公論報》【台語文社論】集）

《詩歌聲裡》（華語文學評論集）

《相思蟬》（台語【台美人小說】集）