懷念彭明敏教授

-台灣自救兮先知、一代偉人

-記一場温心感動兮「美國加州各界追思彭明敏教授紀念會」

《彭明敏教授. : 1923.08.15 ~ 2022.04.08》

《台灣感謝有你感恩有你一路好行》

時間 : 2022 年 5 月 22 日下晡兩點開始

地點 : 大洛杉磯台灣會館大禮堂

會前連絡準備

今年四月初八，高龄九九歲兮彭明敏教授佇故鄉台灣仙逝；南加州台灣會館發起，邀約聖地牙哥台灣中心、佮北加州台灣會館共同主辦遮場彭明敏教授追思紀念會。26冬前彭明敏教授競選台灣頭一次兮民選總統，萬通銀行吳澧培董事長召集海外彭明敏總統競選後援會。彼時兮總幹事抑是目前會館執行長林榮松醫師傳來紀念會資訊，有欲刊報紙全頁廣告、有奬青年徵文、出版紀念彭教授專册，爭求贊助經費。阮佇北加州廣傳互會館會友、佮北加州台灣同鄉聯合會各分會，抑通報州府沙加緬度台灣同鄉會蔡洋清醫師。

過去台美社區兮大型節目，南北加州前後日各辦一場；偌時日喬袂好勢只辦一場，南加台美人濟優先。北加鄉親常組團大巴士或自行駛車赴會。遮次武漢肺炎疫情抑袂煞，逐傢警慎無意向冒險組團，另外大會早就決定準備同步視訊，互外地鄉親方便參與。北加州僅會館執行長黃美星坐飛機去返，我招二位朋友[前大紐約台灣同鄉會長林俊提、前北美洲台灣婦女會總會長張雅美]同行，約好當日透早七點去載𪜶二位，上I580E/I5S落南，一行三百六十哩、約六點鐘。

黃美星將代表北加州會館致詞，同時追憶伊佮翁婿故張信行醫師過去近四十冬認捌熟似兮民主先知彭明敏教授；舊年中秋張醫師往生，彭教授錄影追思老友。伊佮佇台北照顧彭教授近卅冬兮小弟黄兆源醫師抑傳來袂少珍貴陪伴彭教授兮寫真，我替𪜶做成追思投影片。

會前幾日，林醫師擱傳來廣告稿、節目表，秀贊助捐款徵信。足用心，準備就緒。當日透早，如約七點一刻會齊出發，下晡一點一刻順利提早到會場。會場佈置典雅肅然，禮堂左側長牆掛滿1992返台壯行佮1996總統大選演講造勢寫真，桌上擺放相關册、文物、後援會旗幟、衫帽等，足有歷史性兮物件。

追思彭明敏教授

追思會佇二點由主持人林醫師開場，伊先用30秒默禱為一禮拜前佇Laguna Woods台灣長老教會捨己救人兮英雄鄭達志醫師哀悼致敬。伊講咱欲用感恩兮心來追思一生為台灣前途打拚兮先知先覺人格者彭教授，咱欲得追隨伊兮跤步，繼續為台灣前途打拚。彭教授精通數國語言：台日英法，今日追思會欲用伊上自然兮母語-台語來追思[遮篇懷念文稿抑用河洛台語文配合、簡要分享袂當參與兮鄉親，詳見附件一錄影片]。追思會由美西四大地區兮台美人團體共仝協辦，紲落去，請𪜶兮代表致詞。[見附件一#1]

首先大洛杉磯台灣會館基金會董事長陳柏宇致詞，感謝會館董事、幹部、仝仁用心籌備佈置，佮遠地自北加州、紐約、台灣來兮鄉親朋友。希望年青朋友多認識遮位為台灣民主自由前途貢獻者，共仝來懷念追思咱所敬愛兮前輩彭教授。

聖地牙哥台美基金會董事長張裕華致詞(仝行前董事長歐春美女士在座)，伊係野百合世代，大學時讀過「自由兮滋味」，參與街頭社會運動；伊講彭教授兮台灣前途主權屬台灣人兮主張，影響世世代代。

北加州台灣會館執行長黃美星女士代表會館理事會感謝南加州台灣會館籌備邀阮協辦、佮逐傢兮參與；伊抑回憶近卌冬認識佮彭教授做陣兮經驗。’80年代初期隨翁婿張信行醫師帶三幼子女移民美國，蹛佇奧克拉后馬Ok. 無外久，FAPA成立，𪜶邀請彭教授去演講，成立FAPA-Ok分會。了後彭教授蹛林肯市、波特蘭，邀請伊來佛利蒙過年過節，抑是去奧理岡探望伊；將伊當作家己兮序大長輩、互伊家庭兮温暖。’92返台壯行前佇北加州舉辦全美頭一場幕款餐會。返台後拜託伊佇台北兮小弟黃兆源醫師；講彭教授是咱台灣人兮寶貝，啟蒙台灣人意識；著愛好好照顧伊兮健康，過去近卅冬陪伴，感心。美星講煞，播黃兆源醫師、陳麗娟醫師娘陪伴彭教授做伙出遊、探訪朋友兮寫真影片。美星感念彭教授佮后生彭敀、媳婦阿美，參加二女兒Sonia佇夏娃姨兮婚禮；幾張珍貴相片展示父子之情。林醫師強調坊間流言-父子不睦-無影無跡，呣通黑白信。[一#4]

北美台商會副總會長(Oregon)李旭東致詞，伊是彭教授佇波特蘭兮朋友。彭明敏佇1980年代中FAPA主席下任後搬遷林肯市，’89搬去溫哥華(WA) ，波特蘭/溫哥華兮台灣鄉親攏足尊敬、親切做伙，互伊温暖關懷，多人參與’92返台壯行。2011遷回台灣，曾協助彭教授化裝出逃兮唐培禮牧師抑來送行。[見附件一#5]

彭明敏文教基金會前董事長鄭義和錄影致詞；伊是彭教授兮學生，抑是全美台灣同鄉會創會長，長期支持照顧，頂月初彭教授往生，伊佇彭明敏文教基金會兮面册/臉書FB分享懷念永遠兮老師；伊袂當親身來LA，謹錄影追思，感念老師畢生為台灣前途兮理念貢獻。[一#6]

紲落去，主持人林醫師紹介在場貴賓及協辦團體唱名致謝，貴賓中特別是卅冬隨身細心照料彭明敏教授兮吳惠蘭女士，逐傢感激伊；林醫師抑簡單介紹追思特別活動：青年徵文、出版紀念專集。擱來由大洛杉磯台灣會館基金會執行長吳兆峯詳細介紹「認識彭明敏瞻望新台灣」兮有奬青年徵文比賽[一#9]。

林榮松醫師分享精彩兮「陪伴彭明敏教授民主行」相片回顧，細述返台壯行團兮興奮佮警惶-六冬前菲律賓阿珪諾返國佇機場遭槍殺；佳哉順利返台受歡呼，故鄉高雄21響兮禮砲迎接遊街。’96總統首民選兮海外後援會遊行、掃街、拜票兮鏡頭，卡實足珍貴兮歷史寫真。’99 台灣關係法TRA 20週年紀念會佇洛杉磯會館舉行，邀請20冬前為TRA佇國會作證兮學者彭明敏教授演講，伊講TRA係咱台灣兮護身符；場面浩大感人，洛杉磯時報大幅報導[一#10]。

中場換優美兮音樂追思：

A.「最後的住家」李俊玲獨唱、馬偕詞、李奎然曲。來自加拿大兮馬偕博士[1844.3.21~1901.6.2] 熱愛台灣，伊兮台語詩「最後的住家」見附件二。故鄉台灣是馬偕博士佮彭明敏教授，二位偉人共仝兮最後的住家。

「The Light of Hope」四重唱 : 李俊玲、溫玉妙、沈增慶、葉健；黃令先作曲 [錄影片見附件一#11] 。

音樂追思後由台灣駐美國代表蕭美琴大使致詞，伊早起佇Laguna Woods台灣長老教會為捨己救人兮英雄鄭達志醫師哀悼致敬。伊足呣咁勇敢兮台灣人鄭達志醫師犧牲家己，救著濟濟兮長輩，展現基督「焚而不毀」兮精神，啟示咱艱難兮時刻，著愛更加團結，互相支持。彭明敏教授抑有遮種精神，為台灣兮民主進程貢獻。伊選總統時我誠少年，佇大學時讀著「自由兮滋味」，想欲去台灣參與民主運動，佮父親故鄉兮濟濟勇敢兮台灣鄉親共仝守護咱台灣兮自由民主。[一#12a]

紲落去，TECO-LA 黃敏境處長致詞，伊講民主是台灣上珍貴兮資產，須要年青人了解傳承。彭明敏教授受法國民主自由思想兮影響，相信民主和平非暴力手段兮議會制度。為台灣民主進程設想、啟蒙。’82成立FAPA，’96選總統足有學者風範，雖然無贏，伊兮批評國策時政，受著尊敬。[一#13]

林益顯醫師分享「我所認識的彭明敏先生」；彭教授’84離開FAPA由DC駛車向奧理岡，經聖路易士阮兜過暗，佮我講足濟代誌。了後伊蹛林肯市海邊，足媠！阮去探訪，駛車載阮附近找買厝，買了出租；尾後，伊返台長住，無做厝邊。三四冬前轉去台灣欲見面，不得，謹在喜樂島聯盟大會聽著伊兮演講。希望伊一路好行。[一#14]

最後，咱敬愛兮吳董-吳澧培前資政分享今日兮主題演講：「一甲子的交陪思念彭明敏-彭明敏教授兮堅持 : 大是大非」；伊講彭明敏教授‘92決定欲轉去台灣，邀我做返鄉團召集人，伊為著台灣，受著足大兮壓力，犧牲家庭，大是大非之一。’82成立FAPA，內部失和諧，主席選舉出差錯，蔡同榮勝出；’92蔡同榮選嘉義立委危急，彭教授棄嫌去支援，二百票險勝，蔡同榮感念，從此非常尊敬彭教授，大是大非之二。’92決定返台灣，聯盟發動盟員抗議，張燦鍙、李應元、等盟員闖關入牢，彭教授返台後去探監，化除心解，大是大非之三。’96選總統時兮總幹事莊淇銘後來變節偏藍，彭教授足失望佮伊斷絕關係，大是大非之四。佇九合一選輸後TIW民調奇低，四大老進言為台灣本土執政兮延續，勸伊莫求連任，我佮李遠哲院長分別勸退，無功而返；遂登報正式勸退，受官媒辱罵，彭先生堅持理念，大是大非之五。’95林水泉勸進，民進党主席施明德表示党內有共識支持伊選，伊招吳董回台加入民進党，吳董無加入；初選出變化，頭段党員票許信良勝出，第二階段全國輪迴開放投票，彭先生勝出，代表民進党選總統。了後一直足支持本土政權佮仝理念兮候選人，猶原是大是大非。[一#15]

演講後，主持人感謝與會嘉賓並進行團體合照，結束追思。偕伴返航，回到灣區已半夜；欲當親身與會，足有意義！

會後接續事工

一、追思會全場錄影，順利後製成.mp4數位檔、分講員段，已上傳優宙[YouTube]分享，連結佮QR二維碼秀佇[附件一]。

二、有獎青年徵文比賽，辦法已播佇FB佮台灣公義報網站，進行中。

三、計劃出版《彭明敏教授紀念集》，偏重海外台美人對彭明敏教授兮懷念文章、相片。

後記

彭明敏教授近一世紀兮人生，經歷曲折，二戰失臂，東京帝大、台大、麥吉爾大學、巴黎大學博士，國際太空法權威。秉持知識份子兮良知，為台灣前途設想、啟蒙，自救先知，堅持理念，不向專制獨裁妥協；一生風範，一代偉人，令人敬佩。

追思紀念會回味：

四月彭教授仙逝南加台會館相招

共同協辦追思會北加感謝並答應

廣傳資訊互社區美星將代表會館

連絡弟兆源醫師找傳過去珍寫真